ចំនួនសរសៃធូបតំណាងអត្ថន័យនៃការអុច
ពុទ្ធសាសនាខ្មែរឲ្យតម្លៃនៃការគោរពបូជា គេយកធូបតំណាងជាការថ្វាយបង្គំដល់ព្រះពុទ្ធរូប ទេវតា គុណគ្រូ គ្រូបាធ្យាយ អារក្សអ្នកតា ទីសក្ការវត្ថុស័ក្កសិទ្ធ ជាដេីម។ ការអុចធូបមិនត្រូវចេះតែអុចផ្ដេសផ្ដាសតាមចិត្តអ្នកចង់បានទេជួនកាលអាចធ្វេីឲ្យអ្នកជួបរឿងមិនល្អក៍ថាបានដែរ ដូចជាការអុចធូប អន្ទងដួងវិញ្ញាណ ព្រាយបិសាច រឿងឧបទ្រុបចង្រៃឲ្យចូលមករំខានយាយីជាដេីម ។
ក្នុងនាមជាកូនខ្មែរកាន់ព្រះពុទ្ធសាសនាយេីងគប្បីគួរយល់ពីទំនៀមទម្លាប់របៀបនៃការគោរពប្រតិបត្តិឲ្យបានត្រឺមត្រូវ។
អត្ថន័យនៃចំនួនសរសៃរធូប :
ធូប ១ សរសៃតំណាងឲ្យការគោរពបូជាវិញ្ញាណខ្មោចក្នុងផ្ទះ។
ធូប ២ សរសៃ
តំណាងឲ្យគុណមាតាបិតា។
ធូប ៣ សសៃ
ជាការបូជាព្រះរតនត្រ័យ ដែលមានព្រះពុទ្ធ ព្រះធម៌ ព្រះសង្ឃ ឬមាតាបិតា និងគុណគ្រូ។
ធូប ៤ សរសៃ
តំណាងឲ្យធាតុទាំង៤ (ទឹក ដី ភ្លើង ខ្យល់)។
ធូប ៥ សសៃ គឺបូជាព្រះទាំង ៥អង្គ គឺព្រះកុក្កុសន្ធោ (មាន់) ព្រះកោនាគមនោ (នាគ) ព្រះកស្សបោ (អណ្ដើក) ព្រះសមណគោត្តម (គោ) និងព្រះសិអារ្យមេត្រី (ខ្លា)។
ធូប ៧ សសៃ គឺបូជាញាតិទាំងប្រាំពីរសន្តាន មាន ថ្នាក់លើខ្លួនបីជាន់គឺ ឪពុកម្ដាយ ជីដូនជីតា យាយទួតតាទួត និងថ្នាក់ក្រោមយើងបីជាន់គឺ កូន ចៅ ចៅទួត និងបូករួមទាំងខ្លួនយើងទាំងអស់គឺប្រាំពីរសន្តាន។
ធូប ៩ សសៃ គឺបូជាទេវតា ដែលថែរក្សាទិសទាំងប្រាំបួន គឺ ទិសបូព៌ ទិសអាគ្នេយ៍ ទិសទក្សិណ ទិសនិរតី ទិសបស្ចិម ទិសពាយ័ព្យ ទិសឧត្ដរ ទិសឦសាន និងទិសខាងលើ។
ធូប ១១ សរសៃ
តំណាងឲ្យមេត្តាធម៌ទាំង ១១។
ធូប ១៩ សរសៃ
គឺសម្រាប់ពិធីហៅព្រលឹង (មនុស្សមានព្រលឹង ១៩ រួមទាំងព្រលឹងធំ និងព្រលឹងតូច)។
ធូប ៣៣ សរសៃ
គឺបូជាគុណឪពុកម្ដាយ៕
